Иако МВР во неколку наврати, на повеќе начини апелира, пред се до повозрасните граѓани да не наседнуваат на зачестените телефонски измами за наводни сообраќајни незгоди во кои или има „прегазено дете“ или „возачот мора итно да оди на операција“, па потребни се пари, сепак во денешниот МВР билтен повторно има информација за жена која останала без околу 27.000 евра.
МВР информира дека вчера попладне во 14:40 часот во СВР Тетово, 79-годишна тетовчанка пријавила дека била измамена од едно лице за сума од 16.000 евра и 10.700 швајцарски франци.
„Според пријавеното, лицето ја контактирало телефонски, се претставило како лекар и ѝ кажало дека нејзината ќерка предизвикала сообраќајна несреќа, при што се здобила со тешки телесни повреди и дека треба да плати за неопходната операција. Како што е пријавено, таа парите ги фрлила од балкон на едно лице, а подоцна дознала дека била измамена. Се преземаат мерки за расчистување на случајот“ велат од полицијата.
Министерот за внатрешни работи, Панче Тошковски неделава рече дека во изминатиот период вештите измамници, за кои се претпоставува дека се странски државјани, имале над 500 обиди на слични измами, а од нив околу 100 се успешни.
Најчесто пензионерите, односно повозрасните граѓани во Македонија наседнуваат на измамите, ја даваат заштедата, а шокот по веста дека близок член на семејството е во незавидна состојба игра клучна улога.