Високата претставничка на Европската Унија (ЕУ) за надворешна политика и безбедност, Каја Калас, денес изјави дека е потребно да се изврши „најсилен меѓународен притисок“ врз Русија, по воздушниот напад врз Украина во кој загинаа најмалку 12 лица.
„Нападите од синоќа уште еднаш покажуваат дека Русија е решена да придонесе за страдањето и да ја уништи Украина“, напиша Калас на социјалната мрежа X.
Таа додаде дека е ужасно да се видат деца меѓу жртвите.
„Ни е потребен најсилен меѓународен притисок врз Русија за да ја запреме оваа војна“, рече високиот претставник на ЕУ.
Најмалку 12 лица беа убиени во руските воздушни напади врз неколку украински региони, неколку часа пред планираната размена на затвореници меѓу Русија и Украина.