Украинскиот претседател Володимир Зеленски рече дека најпредизвикувачките делови од мировниот план се прашањата за територијата и парите, осврнувајќи се на замрзнатите руски средства во Европа, како и безбедносните гаранции.
Истакна дека „сега повеќе од кога било“ има шанса да се стави крај на војната, објави Би-Би-Си.
На прес-конференција во Даблин, одржана заедно со ирскиот премиер Мајкл Мартин, Зеленски рече дека вчера разговараше со американскиот претставник Стив Виткоф, кој денеска ќе се сретне со рускиот претседател Владимир Путин во Москва.
Украина сега ги чека резултатите од таа средба.
„Ќе реагирам според тие резултати, ако почувствувам дека можеме да сметаме на вистински, конкретен дијалог, ќе се сретнеме“, рече Зеленски.
Зборувајќи за замрзнатите руски средства, претседателот изјави дека е „крајно време“ да се искористат за поддршка на воените напори на Украина и обнова на земјата.
„Крајно време е да се префрли во Украина за да можеме сигурно да ја обезбедиме нашата одбрана и закрепнување“, додаде тој.