Украинскиот претседател Володимир Зеленски денеска соопшти дека руската армија во текот на изминатата недела нападна 16 украински региони со околу 1.900 дронови, речиси 1.600 авионски бомби и 144 ракети од различен тип, вклучително и балистички ракети.
„Денеска беа фрлени бомби врз Суми. Во Бровари, едно лице загина, а шестмина беа повредени во напад со дрон. Изразувам сочувство до семејствата на жртвите. Харков и Харковската област сè уште се под постојани напади. Во текот на ноќта, Русија изврши напади и врз Одеса, Запорожје и Днепропетровската област. Оваа недела беа оштетени повеќе од 1.500 објекти, вклучително и стотици обични станбени згради“, се наведува во објавата на Зеленски на мрежата „Икс“.
Тој истакна дека значителен број руски компании и претпријатија ги овозможуваат овие напади врз Украина преку производство на компоненти за дронови, ракети и наведувани авионски бомби.