Украинскиот претседател Володимир Зеленски денес разговараше со претседателката на Европската комисија, Урсула фон дер Лајен, известувајќи за тоа на социјалната мрежа X.
Зеленски изјави дека лично ѝ се заблагодари за нејзината „јасна позиција и пораки за поддршка на Украина“ што ги презентираше за време на денешниот говор во Европскиот парламент во Брисел.
„Целосно се согласуваме: сè додека Русија продолжува да ги отфрла сите мировни напори, санкциите против неа мора да се заострат, а одбранбената и финансиската помош за Украина мора да продолжат“ – рече Зеленски.
Тој додаде дека една од темите на разговорот беа замрзнатите руски средства, од кои голем дел се наоѓаат во земјите од Европската Унија.
Во тек е дискусија за тоа дали овие средства можат да се користат за финансирање на украинската одбрана.
„Разговаравме за моменталната дипломатска ситуација и работата на Европската Унија за одлуката за користење на замрзнатите руски средства за одбрана на Украина“, заклучи украинскиот претседател.