Украинскиот претседател Володимир Зеленски денеска изјави дека ѝ нареди на армијата на земјата да го зголеми бројот на напади со дронови со долг дострел врз Русија на 1.000 дневно, во споредба со околу 300 такви напади дневно во претходниот период.
„Постои многу конкретна цел и ние ќе ја исполниме таа задача“, рече Зеленски во своето вечерно обраќање, пренесува „Укринформ“.
Тој наведе дека за ова се разговарало на состанокот на Врховниот командант, каде што се дискутирало и за испораката на оружје за заштита од руските напади.
„Денеска бев во штабот. Клучно е максимално да го искористиме нашето оружје за да се заштитиме од руските напади врз Украина. Најважна е нашата заштита од беспилотните летала ’Шахед‘, како и тоа нашите напади длабоко во руската територија да станат уште почести“, рече Зеленски.
Според него, целта е да се користат околу илјада дронови дневно за напади со долг дострел врз Русија.