Познатиот американски новинар Такер Карлсон вели дека повикот на американскиот претседател Доналд Трамп до сојузниците да го обезбедат Ормутскиот теснец покажа дека Вашингтон повеќе не е светски полицаец.
Зборувајќи во својот подкаст во четврток, Карлсон ги коментираше забелешките на Трамп во кои американскиот претседател се закани дека ќе го бомбардира Иран и ќе го врати во „каменото доба“ без да даде точна временска рамка за прекин на огнот, а воедно ги повика другите земји да „ја преземат водечката улога“ во деблокирањето на Ормутскиот теснец – стратешки канал низ кој течат околу 20% од глобалната трговија со нафта.
Сепак, сојузниците на Вашингтон во НАТО не беа спремни да интервенираат по нападите на САД и Израел врз Иран.
Карлсон тврди дека „нација што наметнува мир е нација што води“, додавајќи дека „земја што наметнува ред во Персискиот Залив, што го отвора Ормутскиот теснец, по дефиниција е земја што владее со светот“.
Со децении по Втората светска војна, се сметаше дека САД се нација способна да одржува ред, но кризата во Ормуз покажа дека тоа повеќе не е случај.
– Не можеме да го отвориме Ормутскиот теснец, а претседателот на Соединетите Американски Држави го рече тоа синоќа, нека го направи тоа некој друг, па завршивме – рече Карлсон.
Тој тврдеше дека дури и ако САД целосно го уништат Иран како кохерентна нација, преостанатите трупи нема да имаат потешкотии да го нарушат морскиот пат со поставување мини, користење евтини беспилотни летала, па дури и само со заканување дека ќе го сторат тоа, што значи дека непријателствата порано или подоцна ќе мора да завршат со дипломатски договор со Техеран.
– Она што се случува во Иран е крајот на американската империја каква што ја знаеме. И тоа е тажно. Империјата умира. Но, тоа не е крајот на Соединетите Американски Држави – додаде тој.
Карлсон призна дека транзицијата ќе донесе „многу страдање и тага“, но истакна дека таа исто така носи ветување за САД кои би можеле да го насочат своето внимание кон западната хемисфера, исто така богата со ресурси и витална за стабилноста на Америка, без да мора да окупираат „земји во кои никогаш не сте биле“.