Соединетите Американски Држави и Иран се блиску до потпишување договор што би вклучувал продолжување на прекинот на огнот за 60 дена, повторно отворање на Ормутскиот теснец и продолжување на преговорите за ограничување на нуклеарната програма на Иран, објави порталот „Аксиос“, повикувајќи се на американски функционер.
Според извештајот, за време на 60-дневниот период на примирје, Ормутскиот теснец би бил отворен без наплата за премин, додека Иран би се согласил да ги отстрани мини што ги поставил во областа за да можат бродовите да поминуваат низ него.
За возврат, САД би ја укинале блокадата на иранските пристаништа и би дале одредени исклучоци од санкциите, што би му овозможило на Иран слободно да продава нафта на меѓународниот пазар.
Нацрт-договорот, исто така, ја вклучува обврската на Иран да не развива нуклеарно оружје, како и преговори за суспендирање на програмата за збогатување ураниум и отстранување на залихите од високо збогатен ураниум.
Два извори запознаени со преговорите изјавија за „Аксиос“ дека Иран веќе дал усни гаранции преку посредници за својата подготвеност да направи одредени отстапки во врска со суспендирањето на збогатувањето ураниум и откажувањето од дел од нуклеарниот материјал.
Според извештаите, во текот на 60-дневниот период, САД, исто така, би се согласиле на разговори за евентуално олеснување на санкциите и одмрзнување на иранските финансиски ресурси.
Досега нема официјален коментар од Белата куќа за наводите во извештајот.