Новиот германски канцелар Фридрих Мерц ја критикуваше американската администрација за мешање во внатрешните работи на Германија, но во исто време најави телефонски разговор со американскиот претседател Доналд Трамп, во четврток.
„Не се мешав во изборната кампања пред американските избори, ниту ги поканив граѓаните да гласаат за оваа или онаа партија, а истото го очекувам и од американските политичари“, рече Фридрих Мерц во интервју за јавната телевизија ЗДФ.
Мерц ги критикуваше неодамнешните изјави на американскиот потпретседател Џеј Ди Венс и државниот секретар Марко Рубио, кои го осудија назначувањето на партијата Алтернатива за Германија (АфД) како екстремно десничарска организација.
Рубио зборуваше за „тиранија“ во Германија.
„Тоа е целосно апсурдна перцепција за Германија“, рече Мерц.
Советникот на американскиот претседател, Илон Маск, во неколку наврати ја поддржа АфД пред германските избори на крајот на февруари.
Мерц најави и дека сака што поскоро да се сретне со американскиот претседател Доналд Трамп.
„Не се познаваме лично, но ќе разговараме отворено“, изјави новиот германски канцелар.