Иран испрати нов мировен предлог до САД, со услови кои, според американската страна, се слични на претходните понуди што Вашингтон веќе ги отфрли, објавува Ројтерс.
Сепак, висок ирански функционер изјави дека американската страна ги омекнала своите ставови по некои прашања.
Пакистански извор потврди дека Исламабад, кој посредува во комуникацијата меѓу страните во конфликтот на Блискиот Исток, го проследил најновиот предлог до Вашингтон, но истакна дека напредокот останува тежок.
– Тие постојано ги менуваат своите цели, а времето истекува – изјави пакистански извор.
Портпаролот на иранското Министерство за надворешни работи, Есмаил Багаеи, потврди дека ставовите на Техеран „ѝ биле пренесени на американската страна преку Пакистан“, без дополнителни детали.
Според изворите што ги цитира Аксиос, Белата куќа смета дека новиот предлог не претставува значително подобрување и не е доволен за постигнување договор.
Американскиот претседател Доналд Трамп изјави дека не е подготвен да прави отстапки кон Техеран, наведувајќи дека Иран „сака договор повеќе од кога било“.
„Знам дека тие сакаат договор повеќе од кога било, бидејќи знаат што доаѓа“, рече Трамп.
Според иранскиот извор, предлогот вклучува фокус на завршување на војната, повторно отворање на стратешкиот Ормутски теснец и укинување на поморските санкции, додека спорните прашања за нуклеарната програма и збогатувањето на ураниумот би биле решени во подоцнежна фаза.
Исто така, се наведува дека САД наводно се согласиле делумно да ослободат дел од замрзнатите средства на Иран, кои се проценуваат на десетици милијарди долари, иако Иран бара целосно деблокирање.
Иранскиот извор, исто така, тврди дека Вашингтон покажал поголема флексибилност кога станува збор за ограниченото продолжување на мирнодопската нуклеарна програма под надзор на Меѓународната агенција за атомска енергија.
Иранската новинска агенција Тасним објави дека САД наводно се подготвени да укинат дел од санкциите за нафта за време на преговорите, но овие тврдења не се официјално потврдени.
По шест недели конфликт, на сила е кревко примирје кое следеше по воздушните напади на САД и Израел врз Иран. Сепак, преговорите со посредство на Пакистан се во застој, а САД тврдат дека примирјето е „на работ на опстанок“.