Создавачот на најголемиот успех на српскиот национален фудбал, освојувањето на титулата светски шампион со млади во 2015 година во Нов Зеланд, во принцип им кажа „да“ на претседателот на ФСС, Драган Џајиќ, и на генералниот секретар Бранко Радујко, пишуваат денеска српските медиуми.
Пауновиќ е прв фаворит од моментот кога Драган Стојковиќ поднесе оставка, по поразот од Албанија во квалификациите за Светското првенство.
Сите други кандидати беа одлична покривка, така што тандемот од ФСС може мирно да ја заврши работата со Вељко Пауновиќ. Неофицијално, постигнат е усен договор и сè што останува е тој да се стави на хартија.
– Како што стојат работите сега, Вељко Пауновиќ е новиот селектор на Србија! Искрено, неговите шанси се 90 проценти. Малку што може да го расипе договорот меѓу него и шефот на ФСС – изјави добро информиран извор од врвот на ФСС.
Не е познато колку долго треба да трае соработката помеѓу Вељко Пауновиќ и ФСС, но логично е првиот договор да биде на две години, односно за следниот циклус во кој Србија ќе ги игра квалификациите за Европското првенство.
Целта ќе биде пласман на ЕУРО 2028.
Како што се очекуваше, А-тимот на Србија ќе го предводи Зоран Бата Мирковиќ во последните два квалификациски натпревари за СП 2026.
Селекторот на младата репрезентација треба да го заврши циклусот со натпревари против Англија на 13 ноември во Лондон и Латвија, три дена подоцна во Лесковац.