Во пресрет на УЕФА Супер купот меѓу Реал Мадрид и Манчестер Јунајтед, едни од најголемите фудбалски клубови во светот, Град Скопје со полна пареа ги реализира и последните подготовки за активностите во „неутралната фан зона“, која ќе биде лоцирана во центарот на градот на плоштад „Македонија“.
Организаторите како и илјадниците обожаватели, со нетрпение го очекуваат овој голем дуел на националната арена „Филип Втори“ кој ќе се одигра на 8 август, а за таа цел Град Скопје во соработка со УЕФА, партнерите на УЕФА и ФФМ подготви дводневна богата музичка програма и активности во оваа фан зона.
Скопското Кале пред неколку дена го доби својот Супер куп сјај, а градот веќе полека го трансформира својот изглед за претстојниот натпревар и полека го прикажува спортскиот дух кој допрва треба да го доживеаат верните фанови и од други земји кои се очекуваат да пристигнат за оваа спортска манифестација. Град Скопје подготви и специјални „meeting points” за двете групи на навивачи од каде ќе се упатат кон арената во боите на својот омилен клуб. Навивачите на Реал Мадрид ќе се сретнат на плоштад „Филип Втори“, а навивачите на Манчестер Јунајтед на платото пред спомен куќата на „Мајка Тереза“.
Сите активности и целосната музичка програма подготвени за 7 и 8 август ќе се оддржат во „неутралната фан зона“ на плоштад „Македонија“ каде на неутрална позиција сите фанови ќе можат да се забавуваат и да уживаат во еуфоричната атмосфера.
Неутралната фан зона ќе биде отворена на 7 и 8 август од 11 часот, па се до 19 часот. На 7 август во 11 часот ќе почне грас-рут турнирот помеѓу момчиња кој се организира во склоп на „Трофеј турата“ од страна на ФФМ. Девојчињата кои ќе се натпреваруваат на грас-рут теренот ќе започнат во исто време наредниот ден (8 август).
Сите кои ќе ја посетат „неутралната фан зона“ ќе имаат можност да се фотографираат со трите трофеи на УЕФА, трофеите на Супер купот, Лигата на шампионите и Лига Европа, а за анимирање и забавување со фановите ќе се погрижи и маскотата на Супер куп 2017 Скопје. Дополнителни активности ќе бидат организирани и од главните партнери на УЕФА – Pepsi, Heineken, Master Card и Nissan.
Првиот ден, 7 август (понеделник), на големата бина која ќе биде поставена на плоштад „Македонија“ ќе настапат Симона Попоска, DJ Mats, ContruDJ и DJ Branchez,, додека на 8 август (вторник), се очекуваат настапите на Сара Мејс, DJ Dela, Brass Brothers и DJ Bobi.
Покрај сите досегашни подготовки за претстојниот натпревар, Град Скопје претстави и промотивно видео со цел да ги запознае и странските посетители со знаменитостите и убавините на главниот град. Навивачката еуфорија се очекува да ги исполни улиците на Скопје во деновите кои претстојат, а ќе кулминира на 8 август кога очите на јавноста и љубителите на фудбалот од целиот свет ќе бидат упатени кон Македонија.