Вејн Руни, легендата на Манчестер Јунајтед, испрати јасно предупредување до водечките тимови на Премиерлигата, Арсенал и Манчестер Сити, нагласувајќи дека и покрај сè, Ливерпул не смее да биде отпишан од трката за шампионската титула.
Иако „Црвените“ се десет бода зад врвот на Божиќ, Руни верува дека нивното неодамнешно враќање во форма значи дека актуелните шампиони сè уште би можеле да играат клучна улога во тоа како ќе се одвива сезоната, пишува Goal.com.
Ливерпул имаше сезона со подеми и падови откако ја освои титулата под водство на Арне Слот минатата сезона. По убедливиот триумф во дебитантската година на холандскиот специјалист на „Енфилд“, очекувањата беа големи, но наместо да се борат за врвот, следеше низа лоши резултати помеѓу септември и ноември и ги турна надолу по скалата.
Се чинеше дека испаднаа од трката за титулата, а тешкиот пораз од ПСВ Ајндховен во Лигата на шампионите само ги истакна проблемите со недоследноста и одбранбените пропусти. Сепак, во последните недели ситуацијата драстично се подобри. Серијата од шест натпревари без пораз, заокружена со победа над Тотенхем, го врати Ливерпул на петтото место пред Божиќ.
Руни верува дека Арсенал и Манчестер Сити се уште се главни фаворити, но предупредува дека Ливерпул не треба да се потценува. Зборувајќи во својот подкаст на Би-Би-Си, поранешниот напаѓач рече: „Изгледа дека Арсенал и Сити ќе бидат двата клуба што сега ќе се издвојат на врвот на Премиерлигата“.
Сепак, тој брзо го насочи вниманието кон шампионите.
„Сепак, и Ливерпул, ако имаат серија добри резултати и победат на неколку натпревари, никогаш не можете да ги отпишете“, додаде Руни.
„Ако ја добијат таа поддршка зад себе, можат да имаат збор во борбата за титулата“ порача екс напаѓачот на “„ѓаволите“
По ранливиот есенски дел од сезоната, тимот на Арне Слот повторно откри дел од цврстината и напаѓачката предност што ја красеа нивната шампионска сезона 2024/25.
Неодамнешниот пресврт се совпадна со поголема тактичка стабилност и подобрени перформанси од нови играчи како што се Хуго Екитике, Флоријан Вирц, Александар Исак и Џереми Фримпонг.
Победата против Тотенхем минатата сабота беше исклучително важна, не само за бодовите, туку и за самодовербата што ја всади во тимот. Сепак, предизвикот останува огромен.
Десет бода зад лидерот Арсенал, Ливерпул повеќе не може да си дозволи да прави грешки.
Ливерпул има само уште еден натпревар до крајот на годината, против Вулверхемптон, што би требало да биде полесна задача со оглед на нивната моментална форма. Сепак, вистинскиот тест доаѓа во втората недела од јануари, кога тимот на Слот ќе гостува кај лидерот во лигата, Арсенал, на „Емирати“.