Пол Погба (32) се враќа во активниот професионален фудбал. Својот последен официјален натпревар го одигра во септември 2023 година во дресот на Јувентус. Моментно е член на францускиот премиерлигаш Монако.
Францускиот играч од средниот ред се враќа на фудбалските терени по двегодишно отсуство поради скандал со допинг. Тој потпиша за Монако на почетокот на годината, но сè уште не играл за клубот од Кнежевството.
На почетокот на сезоната имаше проблеми со кондицијата и физичката подготвеност, а во последните два месеци со препоните и глуждот, но се чини дека е подготвен за новите предизвици.
Популарниот трансфер инсајдер Фабрицио Романо ја потврди веста дека Французинот се враќа на фудбалските терени на следната средба на Монако. Во рамките на 13-тото коло од Лига 1, Рен ќе го пречека Монако во сабота во 19:00 часот.
Пол Погба беше суспендиран четири години во 2023 година поради зголемена доза на тестостерон во крвта. Суспензијата беше намалена на 18 месеци откако беше утврдено дека Французинот несвесно зел дополнителна доза на тестостерон, по предлог на лекар од Мајами.
Тренерот на Монако, Себастијан Покоњоли, го коментираше неговото враќање на терените.
– Веќе реков дека ќе ја процениме неговата состојба. Сепак, последниот пат кога го споменав тоа, знаеме што се случи. Не сакам да брзам со неговото враќање, кое дефинитивно ќе се случи наскоро. Можам само да кажам дека го гледам на теренот како исполнет фудбалер кој едвај чека повторно да игра на највисоко ниво. Немам никакви сомнежи во тоа – порача тој.