Поминаа точно десет години од сензационалната титула на Лестер во Премиер лигата. Тимот на Клаудио Раниери го воодушеви фудбалскиот свет, сруши сè пред себе и напиша едно од најубавите поглавја во историјата на фудбалот.
Тоа беа златните денови на „лисиците“, денови што ќе ги паметат навивачите на тој клуб засекогаш. Но, и деновите што ќе биде тешко да се повторат – Лестер поминува низ тешки времиња, бидејќи синоќа потпиша испаѓање во Лига 1, третата лига на англискиот фудбал.
Лестер потпиша капитулација две кола пред крајот на Чемпионшип. Ремито со Хал (2:2) дома ги остави недостижни седум бода зад Блекбурн, кои се во безбедната зона. Од освојувањето на Премиер лигата, играњето во Лигата на шампионите, преку освојувањето на ФА Купот во 2021 година, па сè до преселбата во Лига 1 – тоа беше патување што веројатно никој од навивачите на Лестер не можеше да го очекува.
Сезоната по освојувањето на Премиер лигата, Лестер стигна до четвртфиналето на Лигата на шампионите каде што беа елиминирани од Атлетико Мадрид, двапати завршија петти во Премиер лигата (2020 и 2021) за да го освојат ФА Купот во 2021 година, а една година подоцна стигнаа до полуфиналето на Конференциската лига каде што беа елиминирани од Рома.
И некаде тогаш започнува пропаста на клубот…
Откако го освоија осмото место во Премиер лигата во 2022 година, а потоа стигнаа до гореспоменатиот финиш во Конференциската лига, тогашниот менаџер, Брендан Роџерс, изјави дека клубот мора да ги промени своите очекувања и да го наруши сегашниот поредок во Премиер лигата. Но, на почетокот од следната сезона (2022/2023), Лестер беше без победа во првите седум натпревари во Премиер лигата (нерешено и шест порази), а ја оствари својата прва победа против Нотингем Форест на 3 октомври 2022 година, кога резултатот беше 4:0. Тогаш Роџерс изјави дека клубот мора да се фокусира на освојување на 40 бода за да избори опстанок. А тоа беше во спротивност со неговите претходни изјави.
Роџерс остана во клубот до април 2023 година, а потоа се разделија. Него го наследи поранешниот менаџер на Астон Вила и Норвич, Дин Смит, но тој не успеа да го спречи падот, па „лисиците“ ја завршија сезоната на 18-то место и испаднаа од лигата заедно со Лидс и Саутемптон.
Откако Роџерс си замина, Лестер смени шест менаџери, а клубот е без идентитет. Енцо Мареска ги врати во Премиер лигата, а по Италијанецот, тимот го предводеше Стив Купер, а потоа и Руд ван Нистелрој, кој победи на пет од 27 натпревари, па „лисиците“ испаднаа од Премиер лигата.
На почетокот на оваа сезона, за тренер беше назначен Марти Сифуентес, со кого разделбата се случи во јануари во време кога Лестер беше шест бода зад местото што води во плејофот за пласман во Премиер лигата. А потоа во јануари беше отпуштен, па оваа одлука на крајот од сезоната изгледа многу лошо.
Сифуентес беше наследен од Гари Роует во февруари, 24 дена по неговото заминување, а тимот потоа се соочи со одземање од шест бода поради кршење на финансискиот фер-плеј. Во тој момент Лестер беше надвор од зоната за испаѓање само поради гол-разликата.
Но, дури ни назначувањето на Ровет не ги спаси „лисиците“, кои оттогаш победија само еднаш, во март против Бристол Сити. Последната капка беше неодамнешниот пораз од Портсмут (1:0), а грди сцени беа видени по натпреварот – играчот од средниот ред на Лестер, Хари Винкс, влезе во расправија полна со пцовки со навивачите на Лестер, додека повторно се слушнаа повици за „менаџментот да си замине“.
И потоа синоќешниот нерешен резултат со Хал го запечати ќорсокакот, кој започна многу порано, не оваа сезона.
Лестер беше огромно погоден од смртта на сопственикот Вичаи Шриваданапраба, кој загина во хеликоптерска несреќа во 2018 година, по нерешениот резултат со Вест Хем.
Шриваданапраба го купи Лестер во 2010 година за 39 милиони фунти, ги отплати долговите, го врати клубот во Премиер лигата, а потоа ја освои титулата.
„Тој беше толку влијателен, ги заврши сите работи“, се присети шампионскиот дефанзивец на Лестер – Роберт Хут.
Потоа на чело на клубот дојде синот на Вичаи, Аџават, кој го презеде бизнисот на својот татко. Но, тајландските сопственици беа принудени да го стегнат ременот поради катастрофалниот економски удар што пандемијата на коронавирусот го нанесе врз нивниот бизнис со бесцарински производи. А потоа и Лестер ги почувствува последиците.
Финансиите не беа добри, а Би-Би-Си пишува дека загубата на клубот за сезоната 2024/2025 е дури 71,5 милиони фунти.