Кошаркарската репрезентација на Србија доживеа дебакл на овогодинешниот Евробаскет со пораз во осминафиналето од Финска – 92:86.
Иако момците предводени од Светислав Пешиќ, според мислењето на сите еминентни кошаркарски работници низ целиот свет, а пред сè во Србија, беа први фаворити за освојување на златниот медал на Евробаскетот, српската репрезентација на крајот неславно го заврши натпреварувањето во нокаут фазата од турнирот.
Како што веќе објави дел од српските медиуми, тренерот Светислав Пешиќ нема да остане на чело на српската селекција, бидејќи му истекува договорот со Кошаркарскиот сојуз на Србија (КСС), кој го продолжи есента во 2024 година.
Јавноста веќе го бара името на новиот селектор на Србија, бидејќи квалификациските натпревари за Мундобаскет 2027 ќе започнат веќе во ноември оваа година.
Како што објави „Спорт клуб“, КСС веќе го контактирал Душан Алимпиевиќ (38).
Младиот и перспективен тренер моментно го води тимот на Бешикташ, со кого направи чудо за краток временски период.
Минатата сезона успеа да го одведе истанбулскиот клуб до финалето на турското првенство, каде што ривал беше моќниот Фенербахче.
Иако има само 38 години, Алимпиевиќ веќе се докажа како енергичен и посветен стручњак, кој се подобрува од сезона во сезона.
Тој во кариерата седеше на клупата на Војводина, Спартак Суботица, ФМП, Црвена Звезда и Бурса.