Шпанскиот фудбалски стратег Пеп Гвардиола верува дека наставниците и лекарите треба да бидат значително подобро платени како дел од борбата за образование на децата и решавање на проблемот со расизмот во општеството.
Тренерот на Манчестер Сити го изрази своето мислење како одговор на прашањето за повторените расистички навреди на кои е изложен играчот на Реал Мадрид, Винисиус Жуниор, пишува Goal.com.
Гвардиола истакна дека расизмот не е проблем што се однесува само на фудбалот или на една земја.
„Проблемот е што расизмот е насекаде. Не само во Шпанија. Во Англија, насекаде. Проблемот е што луѓето веруваат дека нивната раса е подобра од друга, дека нивниот јазик е подобар од друг, дека нивната култура е подобра. Ова се случува многу долго време“, рече тој.
Тој нагласи дека образованието е клучно за идните генерации.
„Мора да ја прифатиме различноста. Живееме во свет каде што миграцијата се зголемува. Училиштата и новите генерации се важни, а расизмот е насекаде. Луѓето кои треба да бидат повеќе платени се наставниците и лекарите. Тие се најважни за новите генерации. Наместо тоа, менаџерите, актерите и ние фудбалерите сме повеќе платени од нив“, заклучи шпанскиот експерт.