Поранешниот играч на Манчестер Јунајтед и на Јувентус, Патрис Евра, зборуваше за отпуштањето на Игор Тудор од клубот од Торино.
„Ви благодарам за сè, господине. Но, оваа порака е и за играчите, бидејќи кога тренерот добива отказ, тоа значи дека не сте ја завршиле добро својата работа на теренот. Ми се случи само еднаш во кариерата и се чувствував како ѓубре“, рече Евра.
Французинот додаде дека денешните фудбалери, под влијание на социјалните мрежи, не можат да се споредат со оние од неговата генерација.
„Не сакам да бидам груб кон нив, но тоа е нова генерација – генерацијата на TikTok. Тие веќе не се фудбалери, туку брендови, рапери, инфлуенсери. Тие имаат премногу одвлекувања на вниманието. Ние само јадевме, спиевме и игравме фудбал. Денес, тоа го нема.“
Евра заклучи дека Јувентус го изгубил својот идентитет.
„Клубот целосно се промени, ги изгубија своите вистински вредности. Кога дојдов, претседателот Ањели беше секогаш со нас, заедно со Недвед, Марота и Паратичи. Сега тоа го нема“, рече Евра.