Хари Кејн продолжува да постигнува голови во дресот на Баерн и оваа сезона, а неговите игри во Минхен не поминаа под радарот на европските гиганти.
Англискиот голгетер е убедливо најдобар стрелец во Бундеслигата со 14 гола, па затоа не е изненадувачки што приказните за интересот на други клубови циркулираат сè почесто. Меѓу оние кои, според извештаите од Пиринеите, го насочиле вниманието кон Кејн, е и шампионот на Шпанија – Барселона.
Каталонците наводно го гледаат Кејн како идеален наследник на Роберт Левандовски, кој влезе во последната година од договорот и е се поблиску до крајот на епизодата на Камп Ноу. Сепак, од таа работа нема ништо, барем засега.
Во интервју за германскиот „Билд“, Кејн јасно изјави дека немало контакти со Барселона и дека неговиот фокус е исклучиво на Баерн.
– Немам никаков контакт со никого. Се чувствувам многу удобно тука, иако сè уште не сме разговарале за мојата ситуација со Баерн. Значи, нема брзање, многу сум среќен во Минхен. Малку е веројатно дека нешто ќе се промени по оваа сезона – рече Хари Кејн.
Таквата изјава звучи како ладен туш за Барселона и практично како „шах-мат“ во обидот да го доведат следното лето.
Секако, никогаш не треба да се каже „никогаш“ во фудбалот, но пораката од Минхен е јасна: Кејн не се гледа себеси никаде на друго место во моментов.
Ова значи дека, ако Каталонците навистина планираат нова „деветка“, ќе мора да ја бараат на друга адреса.