Главниот државен обвинител на Хрватска, Иван Турудиќ денеска го потврди апсењето на министерот за здравство Вили Берош, кој во меѓувреме е разрешен од должноста, и уште две лица.
Истрага ќе се води и против едно правно лице за примање и давање поткуп.
Турудиќ на прес-конференцијата потврди дека рано утрово му се јавил премиерот Андреј Пленковиќ и прашал дали е вистина дека Берош е уапсен, што тој само потврдил.
На прашањето како реагирал Пленковиќ, Турудиќ рече дека не знае со оглед на тоа дека станува збор за телефонски разговор.
Тој тврди дека Канцеларија за сузбивање на корупцијата и организираниот криминал (УСКОК) ја иницирал акцијата, а не ЕППО.
Тој, исто така, рече дека УСКОК и ДОРХ не ни знаеле дека обвинителите на ЕУ го истражуваат истиот случај.
Турудиќ изјави дека истрагата е под надлежност на Државното обвинителство на Хрватска (ДОРХ) и дека Европското јавно обвинителство (ЕППО) не постапувало согласно уредбите бидејќи не го информирало ДОРХ за истрагата.
Тој смета дека ДОРХ е одговорен за овој случај бидејќи се работи за средства од државниот буџет.
„Нема да го контактирам со ЕППО, доколку предизвикаат судир на надлежност, тогаш ќе се одлучува за јурисдикцијата. И за тоа ќе одлучувам јас, односно надлежното национално тело ДОРХ“, рече Турудиќ.
Тој пред новинарите изјави и дека Берош не се товари за кривично дело примање и давање поткуп, туку за тргување со влијание. Европските обвинители тврдат дека Берош земал и мито.
И додека Турудиќ потврди апсење на три лица, ЕППО претходно соопшти дека истрагата се води против осум лица.