Поради војната на Блискиот Исток и големите прекини во поморскиот сообраќај, како и целиот друг товар, илјадници луксузни автомобили што патуваа од Јапонија до Обединетите Арапски Емирати неочекувано завршија на островот Ламу, покрај брегот на Кенија.
Тоа е мал автентичен остров кој е на листата на светско наследство на УНЕСКО и таму моментално се паркирани десетици нови „поршеа“. Станува збор за дел од повеќе од 4.000 возила истоварени од два брода кои не можеа да стигнат до Дубаи поради иранската блокада на Ормутскиот теснец.
Иронијата е уште поголема затоа што на овој историски остров – автомобилите всушност се забранети.
Ламу е познат по своите тесни улички и зачуваната традиција, каде што луѓето се движат пеш, со велосипед или со помош на магариња, пишува BBC News Africa.
И приказната не запира тука – следната недела се очекува да пристигне уште еден брод со дури 5.000 возила.
„Бродовите што требаше да одат во Заливот сега едноставно талкаат по морето бидејќи ситуацијата таму се влоши“, рече менаџерот на пристаништето – Абдулазиз Дадо Мзи.
Иако признава дека ситуацијата не е причина за славење поради тешките услови во регионот, тој додава дека тоа е сепак неочекувана деловна можност за Лама.
Пристаништето Ламу, имено, планирано уште во 2012 година како дел од голем инфраструктурен проект вреден 23 милијарди долари, денес се најде во центарот на глобалните транспортни превирања.
Во меѓувреме, познатите италијански производители на луксузни автомобили Ферари и Масерати ги прекинаа пратките за Блискиот Исток.
Од Ферари велат дека внимателно го следат развојот на ситуацијата и можните последици за бизнисот, додека од Масерати ја опишуваат ситуацијата во транспортот како – многу критична.