Портпаролката на руското Министерство за надворешни работи Марија Захарова денеска излезе со став дека договорот за решавање на спорот за името меѓу Македонија и Грција не се потпира на широк консензус.
Таа на својот Твитер налог објави дека договорот наместо да предизвика обединување, предизвикува раскол во двете земји.
-Решението за името треба да се потпира на широк општествен консензус и беспрекорна уставна основа. Преспанската спогодба не е таков случај. Таа само предизвика дополнителен раскол и во Грција и во Република Македонија, објави Захарова на Твитер.
Захарова минатата недела изјави дека стремежот на НАТО механички да се прошири во Европа не може да ја зацврсти безбедноста, а форсираното вовлекување на Македонија во тој воен блок, само потврдува дека „политиката на отворени врати“ станува самата на себе цел.
Таа тогаш на брифингот за новинарите во Москва меѓудругото рече дека форсираното вовлекување на Македонија во НАТО претставува инструмент за освојување на геополитички простор.
-Станува збор, всушност, само за едно – за постигнување воена предност, изјави Захарова на 12 јули, кога Македонија и официјално доби покана за членство во НАТО.