Обвинувања за непотизам, политички реваншизам, корупција, на време ниско ниво на комуникација, неаргументирани дофрлања и тајмер како на дебата за пред избори. Долгата и досадна дебата на двајцата лидери на партии не донесене ништо ново, непознато за јавноста. Од време на време нивото на дебатата се сведуваше на маалска расправа: „Ќе ти дојдам на кафе“, „Зоране..“, „Ти кај татко ти беше асистент“.. „лажеш-сушиш“.
Претседателот на ВМРО-ДПМНЕ, Христијан Мицкоски обвини за непотизам при вработувањата, а како примери ги наведе вработувањето на братот на градоначалничката на Битола и сопругата на градоначалникот на Берово, Заев праша како Мицкоски станал сопственик на хидроцентрали.
-Како стана сопственик на пет хидроцентрали, а сега градиш куќа од 500 квадрати во Тафталиџе?
Мицкоски возврати дека Заев манипулира и не е добро информиран. Сопственик сум на 10 проценти од три хидроцентрали, а куќата е во Влае.
Тој реплицираше на Заев кога премиерот кажа дека на конкурсите за вработување шанси имале сите и дека вработувањата во новата влада биле транспарентни.
Мицкоски запраша дали тие вработувања биле преку конкурс, како и дали преки конкурс го ангажираше генералниот секретар на Владата својот кум за адвокат.
– Преку конкурс ли директорката на агенцијата за вработување откако е директор ги вработи сестрата на нејзиниот сопруг, синот на сопругот, внукот од сестра на сопругот и старосватицата? Синот на советникот ваш Грчев исто така преку конкурс го вработи во ЕЛЕМ, на Села и Талат Џафери ќерката, дали сите тие се преку конкурс вработени, запраша Мицкоски.
Премиерот Заев на тоа реплицираше дека тие луѓе и претходно некаде работеле и дека се докажале како способни за тие позиции. Потоа премиерот рече дека Мицкоски нема право да говори за непотизам, бидејќи работел како асистент на неговиот татко на Машинскиот факултет.
Верувам дека граѓаните на Македонија заслужуваат да добијат отворени судски постапки, а тоа ќе биде и најсериозниот симболичен дел на реформите во правосудството, затоа што во нашето правосудство богови во постапките се доказите. Ако ги нема никој не е виновен. Ако ги има секој има да одговара за тоа што се огрешил пред законот, рече премиерот Зоран Заев на ТВ дуелот со лидерот на опозициската ВМРО-ДПМНЕ Христијан Мицкоски.
Според премиерот, денес отворено се зборува за се, така и за она што се случува во правосудството во државата.
– Јас верувам дека не е сјајно, се уште нема никакви кадровски промени во судството. Тоа се минимални, минорни, се работи за исти луѓе што веројатно треба и најголемата реформа да ја направат во својата глава, почнувајќи од нас политичарите, правосудството па дури и медиумите, државната администрација, бизнис заедницата сите. Реформите верувам дека правно формално ќе ги средиме со законите, но нивната имплементација зависи од луѓето. За да имаме квалитетни имплементации мораме да имаме транспарентност, отвореност, достапност до јавноста и граѓаните. Сите на крајот им служиме на граѓаните, рече Заев.
Тој се осврна и на постапката која се водеше против него за случајот „Поткуп“ за што судот изрече ослободителна пресуда.
– Постапката што се водеше против мене буквално беше отворена за граѓаните, ја следеа отворено. Така беше и против поранешниот премиер Груевски, против други случаи каде што јавноста сака да има посветеност и внимание. Тоа вие новинарите го оценувате, таму сте, во самите судници, некогаш со камерите, некогаш директно, на порталите може да прочитате се. Јас верувам дека македонското правосудство е на добар пат да биде независно и да дели правда. Законот во Македонија да важи еднакво за сите, рече Заев.
Мицкоски реплицираше дека се во целосно нерамноправна положба со претседателот на Владата затоа што, како што посочи, трипати бил помилуван за криминал – еднаш од страна на поранешниот претседател на државата за случајот Глобал во Струмица, вториот пат од страна на СЈО за случајот Пуч. Посочи дека иако било ветувано не биле пуштени снимките за Поткуп пред новинарите и оти ако имало независно судство тој ќе бил осуден за поткуп.
– Независноста во судството е клучната реформа. Сега имаме позависно и позаробено судство од било кога во Македонија претходно. Имаме премиер на држава кој ги погодува пресудите, кој кажува дали ќе биде ослободен, рече Мицкоски.
Заев обвини дека опозицијата, па и Мицкоски не смогна сили да се огради од настаните од 27 април.
– Се надевам дека вакви лузни на челото никогаш повеќе македонски политичар нема да има во Македонија. Никогаш да не се повторат. Се уште ги поддржувате ваквите политики, не смогнавте сили ниту еднаш да се оградите од ваквите политики. Не треба никој да има вакви лузни. Барем да се оградевте од таквите политики, од тоа насилство коешто се случи врз македонски политичари, а не треба да се случува ниту врз граѓани. Ова е црното петно на Македонија, рече Заев.
Според него, нема повреда на човекови права или права на пратеници при спроведување на постапката затоа што МВР постапува по судски налог согласно правилник којшто јасно пропишува како се постапува.
– Јас почитувам дека правобранителот има став, но повикувам да се отворат постапки. Ако некој се огрешил при спроведувањето треба да одговара за пример. ВМРО-ДПМНЕ имаат можност да отворат вакви постапки, секогаш може тоа да го направат. Ако има грешка во постапката тој што згрешил треба да си понесе одговорност, рече Заев.
Мицкоски обвини дека Заев извршил предавство со прифаќање на името „Република Илинденска Македонија“, но не одговори што му пречи Илинден да стои во новото име.