СДСМ сака да избега од дебата во Собранието за пожарите кои ја зафатија целата држава. Пратениците на СДСМ и парламентарното мнозинство преку празни изјави и багање од дебата пробуваат да ја прикријат неспособноста на Владата да се справи со важни и сериозни проблеми со кои се соочуваат граѓаните.
Ова се наведува во соопштението од пратеничка група на ВМРО-ДПМНЕ на денешната прес-конференција на пратеникот од СДСМ во Собранието на Република Македонија Петре Шилегов.
– Владата заедно со парламентарното мнозинство предводено од СДСМ, на најарогантен начин покажуваат дека не ги почитуваат граѓаните и нивните проблеми. СДСМ секојдневно покажуваат и докажуваат дека не ги интересираат проблемите на граѓаните, туку само функциите и фотелјите во кои се сместени, се вели во реакцијата.
Веќе извесен период, како што се наведува, во Собранието се избегнува дебата за повеќе суштински проблеми кои ги мачат граѓаните како што се дивата депонија во Струга која секојдневно ги гуши стружани повеќе од два месеци, земјотресите во охридскиот регион, заразната болест хеморагична треска во општина Гостивар, договорот за добрососедство со Бугарија и уште многу други теми од кои што СДСМ сака да побегне.
– Со оваа прес-конференција гледаме дека на пратениците на СДСМ им смета и не сакаат да се дискутира за пожарите кои ја зафатија целата држава. Ги потсетуваме пратениците на СДСМ дека не се избрани да ги штитат интересите на Владата, туку интересите на граѓаните на Република Македонија. Доколку пратениците од власта молчат и работат искучиво во интерес на Владата, опозициските пратеници се спремни со критика да работат во интерес на граѓаните и во интерес на Република Македонија, стои во реакцијата на пратеничката група на ВМРО-ДПМНЕ.