Штипското средно текстилно училиште „Димитар Мирасчиев“ доби верифицирана програма за образование на возрасни.
Директорот на Средното општинско училиште (СОУ) „Димитар Мирасчиев“, Дејан Доневски вели дека програмата за возрасни е за шивач на текстилни материјали.
– СОУ „Димитар Мирасчиев“ оваа година има верифицирана програма за образование на возрасни, тоа е Шивач на текстилни материјали. Во соработка со компанија од Штип и Агенцијата за вработување, ќе можеме да вршиме обука на невработени кандидати кои ќе се јават во Агенцијата за вработување и ќе бидат заинтересирани да ја посетуваат оваа обука. Во текот на наредната недела очекуваме верификација и на инстутцијата за образование на возрасни односно на делот за обука на шивачи на текстилни материјали, рече Доневски.
Тој најави дека како средно училиште веќе имаат воспоставувано и соработка со училишта во Италија.
– Единствено средно училиште во Македонија сме што сме вклучени во италијанската Фондација Чис. Нивни преставници утре ни доаѓаат во посета и следната учебна година група на наставници и ученици од нашето училиште ќе престојуваат во Палермо – Сицилија, каде ќе имаат неколку дневна професионална обука, рече Доневски.
Тој истакна дека во текот на учебната година имале неколку инвестиции, а меѓу кои и реновирање на тоалетите, поставени се клупи во училишниот двор и хортикултурно е уреден. Пролеттва, учениците со свои креации успешно се преставија на повеќе модни ревии. Во единственото средно текстилно училиште во источниот регион се едуцираат само 75 ученици.