Министерот Оливер Спасовски на сведочењето доцна вечерта во кривичниот суд за крвавиот четврток, рече дека напаѓачите фрлале со се’ што ќе стигнат: сталки, летви, кабли, дрвени предмети…
Се присети дека ги видел Бате Геле и Игор Југ во центарот за прес во Собранието. „Бате Геле со слика на Мијалков викаше: Ќе ве убиеме“. Тој рече дека полицијата била како на концерт и не уапсила никого.
Спасовски рече дека критичниот ден околу 22 часот, еден од присутните, по информацијата од новинарката Душица Мрѓа дека претседателот Ѓорге Иванов ќе одржи прес-конференција му рекол: „Сега Иванов ќе прогласи воена состојба и ќе ве затвориме“, на што Спасовски му возвратил дека е луд, зашто очекувал да ги изнесат во мртовечки сандаци.
Тој се присети дека лицата со фантомки слободно се шетале и по потреба ги ставале и ваделе фантомките кои ги чувале во џебовите. Рече дека на Љупчо Николовски, тогашниот пратеник му висело парче од кожата од удар, а исто така и дел од усната на неговото обезбедување. Тој лично имал фрактура на носот и крварел.
„Не сакавме да одиме во клиничкиот центар, зашто ако можеа да влезат во Собранието, тогаш сигурно немаше да бидеме заштитени и дојдовме во зградата на СДСМ и тука ја дадоа медицинските екипи нивната помош со шиење, фрактури и слично“, рече Спасовски.
Рече дека имал чувство на беспомошност, страв и згрозеност дека државата т.е. полицијата не ги заштитила.
Васко Маглешов