Нема да дозволиме никој, во ниту еден момент да ги сатанизира средбите и договорот што го направија албанските партии, порача иницијаторот на средбата за разгледување на точките од декларацијата меѓу албанските партии, Весел Мемеди.
На четвртата средба на лидери на албански партии, на која присуствуваа сите албански партии, освен БЕСА, се разговарало за неколку точки, меѓу кои и законот за јазици според кој нацрт- законот е усогласен со сите партии кои што се дел од владејачкото мнозинство. Мемеди го потврди она што го соопшти и премиерот Зоран Заев – дека законот ќе биде ставен на владина седница и дека паралелно ќе биде доставен на разгледување и до Венецијанската комисија.
Спорот со Грција исто така бил тема на разговор на средбата помеѓу албанските парламентарни партии кои порачуваат дека треба да се започнат преговорите за решавање на спорот за името, со цел да се отвори патот на Македонија кон ЕУ и НАТО.
Албанските партии разговарале и за договорот за добрососедство со Бугарија, за кој сметаат дека треба да биде потпишан бидејќи, според нив, е клучен за решавање на споровите со соседите.
Мемеди изјави дека процесот на реализација на точките од декларацијата на албанските парии е на добар пат и дека голем дел од нивните барање се преточени во владина програма. Тој рече дека средбите ќе продолжат и во иднина, следната средба ќе се одржи наредната недела, а ќе ја свика Гзим Острени од Унитети.
Виктор Јованов