Специјалниот германски пратеник за Македонија Јоханес Хајндл денеска по пристигнувањето во Скопје, даде кратка изјава за неговата мисија овие два дена.
– Дојдов за да се запознаам со ситуацијата и првeнствено да ислушам. Станува збор за тоа процесот кој е инициран од ЕУ и од САД да вроди со успех. Мојата задача ја гледам во активната поддршка на овие напори. Развојот во последните денови одново јасно покажува дека времето е кратко и сега е потребен заеднички напор од сите политички партии за да се спроведат потребните реформи и решително да се продолжи по патот – рече Хајндл.
Хајндл, кој престојува во дводневна посета на Скопје, попладнево во МНР има средба со шефот на македонската дипломатија Никола Попоски.
Потоа тој ќе се сретне со амбасадорите на земјите – членки на ЕУ и на САД во Македонија, а доцна поплдне и утре ќе разговара и со претставници на партиите потписнички на договорот од Пржино.
Хајндл неодамна беше именуван од страна на германскиот министер за надворешни работи Франк Валтер Штајнмаер за специјален пратеник на Берлин кој ќе работи заедно со Европската Унија и САД и ќе помага при решавање на кризата во Македонија.