Малопродажните цени на бензините и дизел горивото од ноќеска на полноќ поевтинуваат за еден денар по литар, одлучи денеска Регулаторната комисија за енергетика (РКЕ).
Со одлуката се врши намалување на рафинериските и на малопродажните цени на нафтените деривати во просек за 1,37, односно за 1,20 отсто.
Новата цена на ЕУРОСУПЕР БС-95 изнесува 77 денари за литар, ЕУРОСУПЕР БС-98 ќе се продава за 78,5, а ЕУРОДИЗЕЛ (Д-Е V) за 65,5 денари за литар.
Малопродажната цена на Екстра лесното масло за домаќинство (ЕЛ-1) се намалува за половина денари по литар и сега ќе изнесува 54,5 денари.
Со одлуката на РКЕ за 0,317 денари за килограм се намалува и малопродажната цена на мазутот М-1 НС кој сега ќе чини 38,843 денари.
Како причина за намалувањето на малопродажните цени на нафтените деривати од РКЕ ги посочуваат за 3,71 отсто пониската просечната цена на сурова нафта на светскиот пазар во изминатите 14 дена и за 2,14 отсто повисокиот курс на денарот во однос на доларот.