Израелската армија денеска издаде предупредување за евакуација за жителите на Газа пред да ја прошири својата копнена офанзива во градот.
Во соопштението на армијата се наведува дека израелската армија го означила подрачјето Ал-Маваси во близина на Кан Јунис, на југот од Газа, како „хуманитарна зона“, а улицата Ал-Рашид како „хуманитарен коридор“, пред „проширувањето на копнената офанзива во Газа“ како дел од операцијата „Гидеонова кочија II“, објавува Анадолу.
Армијата ги повика жителите на Газа да „ја искористат можноста да се преселат рано во хуманитарната зона“, која е веќе исклучително пренаселена, бидејќи десетици илјади раселени Палестинци живеат таму во тешки хуманитарни услови.
Израелската армија постојано го бомбардираше Ал-Маваси за време на војната и уби стотици цивили кои се засолниле таму, иако претходно го означи подрачјето како „безбедна зона“.
Во среда, израелската армија официјално објави нова фаза од офанзивата „Гидеонова кочија II“, со декларирана цел за заземање на целиот град.
На 8 август, израелскиот кабинет за безбедност го одобри планот на премиерот Бенјамин Нетанјаху за постепено повторно окупирање на Појасот Газа, почнувајќи од градот Газа. Планот предвидува раселување на околу еден милион Палестинци на југ, опколување на градот и негово заземање по интензивни напади.
Геноцидот во Газа влезе во својот 700-ти ден во петок, при што Израел уби најмалку 64.300 Палестинци. Воена офанзива ја опустоши енклавата, која се соочува со глад.
Меѓународниот кривичен суд минатиот ноември издаде налози за апсење на Нетанјаху и поранешниот министер за одбрана Јоав Галант за воени злосторства и злосторства против човештвото во Газа.
Израел, исто така, се соочува со обвинение за геноцид пред Меѓународниот суд на правдата поради војната во енклавата.