На глобалните пазари минатата недела цените на нафтата пораснаа за околу 1 отсто, бидејќи тие се поддржани од надежта на трговците за побрз раст на американската економија, но повисокиот раст на цените е спречен од слабоста на кинеската економија.
Цената на барелот на лондонскиот пазар минатата недела се зголеми за 1,05 отсто, на 73,87 долари, додека барелот на американскиот пазар поскапе за 1,2 отсто, на 70,35 долари.
По падот за повеќе од 2,5 отсто пред една недела, минатата недела цените вратија дел од тие загуби.
Тие беа поддржани од победата на Доналд Трамп на претседателските избори во САД, бидејќи трговците се надеваат дека неговата политика ќе го поттикне економскиот раст.
Ваквите очекувања беа поткрепени со одлуката на шефот на американската централна банка дополнително да ги намали каматните стапки за 0,25 процентни поени. „Трамп (во неговиот прв мандат) беше про-бизнис. Продолжувањето на неговите политики може да го поддржи растот на економијата во целина и да резултира со поголема побарувачка за гориво“, објаснува Пријанка Сачдева од Филип Нова.
Од друга страна, трговците ги загрижи падот на увозот на кинеска нафта во октомври, деветти месец по ред, и тоа за девет отсто во однос на истиот месец лани. Кинеската економија веќе подолго време расте побавно од очекуваното, па трговците стравуваат дека ниту новите монетарни и фискални стимулативни мерки на кинеските власти нема да имаат значително влијание врз растот на економијата, а со тоа и врз побарувачката.
Побарувачката за нафта во САД не е моментално импресивна. Залихите на нафта во САД минатата недела се зголемија за 2,1 милиони барели. „Силниот долар и слабата побарувачка би можеле да влијаат на цената на нафтата во периодот што следи“, вели Оле Хансен од Saxo Bank.
Од друга страна, евентуалното „интензивирање“ на санкциите на Трамп кон Иран и Венецуела и ескалацијата на тензиите на Блискиот Исток може да го поддржат растот на цените. Поради овие спротивставени сили, цените на нафтата се заглавени во тесен опсег веќе некое време, објаснува Хансен.