Претставничкиот дом на Конгресот на САД усвои закон кој може да доведе до целосна забрана за користење на социјалната платформа ТикТок. Со 360 гласа „за“ и само 58 „против“ донесувањето на овој закон може да значи дека Владата за првпат ќе донесе закон за исклучување на социјална мрежа.
Сенатот се очекува да гласа за нацрт-законот следната недела, а Џо Бајден рече дека ќе го потпише во закон.
„Овој закон ги штити Американците, а особено американските деца, од злонамерното влијание на кинеската пропаганда преку апликацијата „ТикТок“. Оваа апликација е шпионски балон во телефоните на Американците, рече претставникот на републиканците во Тексас, Мајкл Меккол, известува Гардијан.
Усвојувањето на ажурираната верзија на законот доаѓа откако Марија Кантвел, претседателка на Комитетот за трговија на Сенатот, го повика Домот во март да ги ревидира деталите за законот, со што сега се продолжува периодот на продажба за матичната компанија на TikTok, ByteDance од шест месеци на година.
Критичарите на популарната апликација за социјалната мрежа тврдат дека ByteDance, со седиште во Кина, може да собира податоци за корисници и да цензурира содржина која е критична кон кинеската влада.
Во март, Аврил Хејнс, директор на националното разузнавање, предупреди на сослушување на Комитетот за разузнавање на Претставничкиот дом дека Кина би можела да го користи TikTok за да влијае на претседателските избори во САД во 2024 година.
Во меѓувреме, TikTok постојано изјавува дека досега немало и нема да споделува податоци за американските корисници со кинеската влада.
„TikTok е независна платформа, со свој лидерски тим, вклучително и извршен директор со седиште во Сингапур, КОО со седиште во САД и глобален шеф на доверба и безбедност со седиште во Ирска“, велат од компанијата.
Како одговор претходно оваа недела на претстојното гласање во Претставничкиот дом, TikTok напиша објава на социјалните мрежи во која го изразува своето незадоволство од законот и способноста на САД да „затвори платформа која придонесува со 24 милијарди долари за американската економија годишно“.