Собраниската Комисија за прашања на изборите и именувањата утре ќе заседава и ќе одлучува кои личности ќе бидат предложени за пленарна седница за директори на неколку институции и членови на комисии, меѓу кои и на Оперативно-техничката агенција – ОТА и главен државен ревизор.
Седницата е закажана за 14 часот, но не можат да се добијат имињата на кандидатите. На веб страната на Собранието, само се набројани точките на дневен ред, но без вообичаените придружни материјали.
Исто така се очекува Комисијата да донесе предлог-одлука за изменување на Одлуката за висината на надоместокот на пратениците за користење на автомобил во лична сопственост за службени цели и надоместок на трошоци за патарина и да донесе одлука за утврдување на висината на надоместокот за закупнина на стан.
Собраниската седница ќе се одржи во среда.