Конечниот Договорот со Република Грција за чија што Ратификација денеска со големо мнозинство се изјаснивме ЗА е патриотски чин, изјави Костадин Костадинов од СДСМ.
Тој вели дека Договорот го обезбедува и зајакнува македонскиот идентитет, носи членство на Македонија во ЕУ и НАТО и ја обезбедува македонската иднина.
– Македонски народ, македонско оро, Македонец, Македонка….обезбедени еднаш засекогаш. После 11 години стоење во место, Македонија се врати на вистинскиот, на европскиот пат. Извесно е, добиваме покана за членство во НАТО, имаме датум за почеток на преговори со ЕУ. Конечно ќе станеме дел од европските и светски демократии, кои гарантираат напредок, просперитет, стабилност и безбедност. Бидејќи Законот за ратификација на овој Договор Собранието денеска го изгласа по втор пат со големо мнозинство, Ѓорге Иванов е должен да го потпише Законот за ратификација на Договорот со Грција. Никој не е над уставот и законите. Никој нема право да ја кочи македонската иднина. Во спротивно Иванов ќе направи кривично дело, постапува надвор од неговите надлежности и директно се меша во законодавната власт, односно во работата на Собранието како законодавна власт, вели Костадинов.
Тој додаде дека нема да дозволат, како што рече, деструктивните сили да ја вратат Македонија назад во мрачното минато на криминал, уназадување, изолација и неизвесност.
– Последниот збор секако ќе го имаат граѓаните на референдум. Убедени сме, граѓаните ќе кажат ДА за членство во ЕУ и НАТО, ќе кажат ДА за македонската иднина, рече Костадинов.