Државниот студентски дом ги отфрли обвинувањата на Филип Ѓорѓиев од ВМРО-ДПМНЕ дека студентите наместо ориз со месо јаделе ориз со бубачки. Од таму порачаа дека СДСМ инвестирал 660 милиони денари за подобри услови за студентите, додека, како што велат, ВМРО-ДПМНЕ го уништил студентскиот стандард.
„Очигледно Филип Ѓорѓиев заборава дека 11 години неговата партија го уништуваше стандардот на студентите, оставајќи ги студентските домови во мизерни услови. Со лажни фотографии и обвинувања, ВМРО-ДПМНЕ не може да ја префрли одговорноста од своето владеење врз СДСМ, а студентите добро знаат кој е одговорен за актуелните состојби. Владата предводена од СДСМ издвои 660 милиони денари за подобрување на стандардот на студентите, а проектите како младинската гаранција ќе отворат перспективи за младите во земјата.
Младите и студентите се приоритет за СДСМ, тоа е факт кој ВМРО-ДПМНЕ со ниедна лажна прес конференција не може да го побие. Наскоро Владата започнува со темелни реконструкции и реформи за подобрување на условите во домовите, но и обезбедување на перспектива и вработувања за младите во земјата, додаваат од Државниот студентски дом.