Општина Крива Паланка додели грантови на 16 граѓански организации со цел нивна активна вклученост во креирање на локалниот развој и јакнење на капацитетите на здруженијата кои дејствуваат на подрачјето на оваа општина.
Договорите денес беа официјално врачени и потпишани на свеченост од страна на градоначалникот на Крива Паланка, Борјанчо Мицевски.
– Исполнувајќи ги критериумите за транспарентно и отчетно, како и одговорно работење, предвидената сума од 800.000 денари од буџетот за 2018 година за трансфери до граѓански организации ги доделуваме согласно јавен повик на кој пристигнаа 19 апликаци, а 16 од нив се одобрени и ќе бидат поддржани. Има квалитетни проекти од различни сфери: земјоделие, култура, спорт, фолклор и традиција, од областа на младите, а сите се насочени кон подобрување на работењето на овие здруженија, збогатување и надополнување на секторите во областите во кои ќе бидат имплементирани, со што граѓанскиот сектор, за прва пат е поддржан на транспарентен начин и стимулиран да биде активно вклучен во креирањето на локални политики и развој, истакна Мицевски.
Дел од апликантите за прв пат поднесуваат проектни апликации, па од општината планираат со сите расположливи ресурси и искуство да помогнат грѓанските организации заедно со поискусните да можат да добијат вештини за понатамошно полесно аплицирање пред домашни и странски донатори.
Временската рамка за спроведување на проектите е крајот на календарската година, а корисниците на средства имаат обврска на транспарентен начин, по реализација на проектните активности, во рок од 30 дена да достават наративен и финансиски извештај за оправдување на искористените финансии, што пак, ќе биде основен предуслов за повторно аплицирање следната година.