На јавниот повик за финансирање проекти за намалување на загадувањето на воздухот „О2 предизвик“ на Фондот за иновации и технолошки развој пристигнале 30 предлози, од кои 27 биле потполни.
Во понеделник ќе започне селекцијата на предлозите, а тие што ќе добијат повеќе од 51 поен влегуваат во финална фаза.
На повикот се пријавиле 30 микро, мали и средни претпријатие со свои предлог проекти, од кои 27 биле потполни. Осум проекти биле за „користење на енергија за греење“ и „транспорт и мобилност“, девет биле во областа на „градежништво и урбани алтернативи“, додека две апликации биле со повеќесекторски пристап.
Оценувањето на проектите ќе го врши комисија составена од Јован Деспотовски, директор на Фондот, Јани Макрадули, заменик министер за животна средина и просторно планирање, Јасмина Белчовска од УНДП, Ана Чоловиќ Лешовска од Еко-свест, Татјана Атанасовска – Горздановска од 02 Коалиција, како и две стручни лица од областа на техничкото решение и деловните планови.
Проектите кои што ќе влезат во финалната фаза ќе имаат можност директно да ги презентираат проектите пред комисијата. Вкупниот буџет на повикот е 6 милиони денари, средства на Фондот за иновации и технолошки развој, обезбедени преку Буџетот на РМ.