Оградувајќи се однапред од каква било партиска и политичка припадност, наклонетост, протежирање нечија страна и слично, како монашко братство кое повеќе од 20 години верно и служи на светата Македонска православна црква – Охридска архиепископија и на Татковината Република Македонија, денеска, како што велат од Бигорскиот манастир, јавно и транспарентно го искажуваат нивнот став за Договорот за пријателство, добрососедство и соработка меѓу Република Македонија и Република Бугарија.
„Бидејќи пропагандните отрови вбризгувани во поединечната и колективна свест на македонскиот човек и народ од територијата на денешна Република Македонија во текот на скоро еден век полека го губат своето погубно дејство, настапи време кога можеме слободно да го кажеме своето мислење за некои важни државни прашања, но и без страв и фрустрации да погледнеме во нашето национално минато и да дознаеме дека македонската самобитност и државност се крепат на подвигот и крвта на недобројните наши родољупци и херои на слободата. Лесниот и нецензуриран достап на историските извори денес, ни овозможува да проѕреме длабоко во историскиот бит на Македонецот, непосредно, лично, без никакви идеолошки призми и матрици. Затоа, крајно време е со здрави и трезвени очи да погледнеме во блесокот на нашата сјајна историја, која самата по себе, без никакви додавки, криења, извртени толкувања и слично не прави да бидеме горди Македонци, достоинствени носители на европските цивилизациски придобивки“, се вели во соопштенето на Бигорскиот манастир во врска со Договорот за пријателство, добрососедство и соработка меѓу Република Македонија и Република Бугарија.
Тие велат дека, оградувајќи се однапред од каква било партиска и политичка припадност, наклонетост, протежирање нечија страна и слично, како монашко братство кое повеќе од 20 години верно и служи на Македонска православна црква – Охридска архиепископија и на Република Македонија, се одлучиле јавно и транспарентно го искажат нивниот став за договорот.
„културниот идентитет и националната посебност, колку и да звучи парадоксално, подразбираат и заедништво и испреплетеност со други идентитети и посебности. Пример за таква историска симбиоза се македонскиот и бугарскиот народ. Таа вродена вековна близост се пројавува во многу значајни сегменти од општественото живеење: јазик, фолклор, култура, настани, дејци… Впрочем, да не заборавиме и дека нашите два народа имаат една цивилизациска лулка, заеднички крштелен купел – имено, мисијата на Светите Браќа Кирил и Методиј и особено на нивните свети ученици, покрстувањето за време на Светиот Рамноапостолен цар Борис-Михаил и почетокот на заедничката писменост. Тоа ни дава право, или подобро кажано, обврска да го негуваме тоа духовно сродство и близина, без притоа, се разбира, да се негираме и омаловажуваме едни со други во нашите културни особености. Всушност и брат со брат се разликува, и семејство со семејство, и град со град, и област со област, и говор со говор… Но, не смееме да дозволиме различностите да станат главниот фактор во нашите меѓусебни односи и причина за омраза и раздор. Напротив, многу повеќе се нештата што не обединуваат, а и самите различности треба да ги гледаме како наследство од нашето заедничко суштествување“, оценуваат од Бигорскиот манастир.
Врз основа на ова, сметаме, се потенцира, дека Договорот за пријателство, добрососедство и соработка меѓу Република Македонија и Република Бугарија, чиј зародиш треба да го лоцираме уште во почетоците на независната и самостојна македонска држава, е природна последица на историските текови. Тој просто не е само потпис на една влада и премиер и друга влада и премиер, туку логичен и ненаметлив исход на културните и општествени збиднувања во двете држави.
„Според наше мислење, договорот е срочен во духот на европското право, без двосмислени политички фрази, без никакви навреди, потценувања или превагнувања на едната или другата страна. Дополнителен аргумент за неговата полезност е и суштинската потреба да се има најблизок соработник и сосед пријател, особено за дејствување во меѓународно поле. Во контекст на ова, сметаме за потребно да потсетиме дека Република Бугарија беше првата земја што ја призна Република Македонија и што изврши дипломатско влијание за Русија да ја признае. Исто така, таа беше земјата што значително помогна Македонија да не дојде до финансиски крах, кога во 1994 година беше воведено трговско ембарго кон нашата држава. Дополнително, посебно значаен факт е тоа што во договорот заедничката историја се јавува не како јаболко на раздорот, ами како мост кој „ги поврзува двете држави и нивните народи“, велат од Бигорскиот манастир.
5