Министерката за информатичко општество и администрација Марта Арсовска-Томовска денеска одржа работен состанок со претставници од ИКТ-комората при Сојузот на стопански комори (ССК).
Претседателот на ИКТ-комората при ССК, Саша Огненовски, како што соопшти МИОА, ги поздравил активностите на Министерството за системскиот приод кон зголемување на обемот на работна сила во ИКТ индустријата.
На состанокот станало збор и за тековните и идните проекти на Министерството, меѓу кои и оние кои се однесуваат на развојот на електронски услуги за граѓаните. Се разговарало и за потребата од дополнителна поддршка на Владата кон развојот на домашната ИКТ индустрија, во вид на даночни ослободувања и обуки.
Двајцата соговорници, како што наведува МИОА, изразиле задоволство од досегашната соработка и се согласиле дека таа ќе продолжи и во иднина.