Професорката Мирјана Најчевска се појави во улога на балерина и на вчерашната втора изведба на претставата „Време на забава“ во режија на Зоја Бузалковска, а во продукција на театарската група „Гнев“.
Се работи за претстава работена според текстовите на Харолд Пинтер, но со силни референци кон актуелната македонска стварност. Најчевска се појавува како балерина да ги забавува претставниците на елитата, на една коктел забава, додека однадвор се слушаат извиците “Нема правда нема мир“ и „Убијци“. Истовремено со дејствијето на сцената се прикажуваа и снимки од тепањето на активистите на 5 мај пред Влада.
Професорката Најчевска напиша дека ја прифатила улогата на балерина како активистички чин, за да покаже дека ако сосема неспособни и некомпетентни луѓе можат да бидат премиер и министри, тогаш и таа може да биде балерина.
„Кога Катица Јанева ја нарекувате специјален јавен обвинител, кога Тодоров го нарекувате министер за здравство, кога Ѓорѓе го нарекувате претседател на држава, кога Груевски го нарекувате премиер, кога Миленко го нарекувате новинар, кога Адеми може да биде министер за образование, кога Латас го нарекувате професор, кога Караѓозоска ја нарекувате амбасадорка, кога Миновски може да биде претседател на Комисија за заштита од дискриминација, кога … јас мислам дека заслужувам да бидам наречена балерина.“, напиша на својот фејсбук профил, по премиерата на претставата, професорката Најчевска
Во текот на претставата беше пуштена и една од „бомбите“ на опозицијата во која се слуша снимен разговор на Гордана Јанкуловска во врска со убиството на Мартин Нешковски.
Ова беше втора изведба на претставата „Време на забава“, во Младинскиот културен центар (МКЦ), по премиерата на МОТ на 24 септември.