Објавени се идејните решенија за објектите кои ќе се изградат во зеленилото на кампусот факултети при УКИМ. Автор на решенијата е Жарко Чаушевски, најангажираниот архитект во проектот „Скопје 2014“ и најомилен на владејачката гарнитура која стои зад овие одлуки.
Според податоците од Бирото за јавни набавки се очекува дека изградбата на овие објекти ќе чини околу 13 милиони евра, како почетна сума. Идејните решенија се одликуваат со барокната стилистика во која доминираат античко-грчки столбови, куполи и первази.
Во двете нови згради ќе бидат сместени Факултетот за физичко образование, спорт и здравје, како и Факултетот за информатички науки и компјутерско инжинерство (ФИНКИ). Дополнително ќе биде уреден просторот околу објектите, односно партерното уредување, а ќе бидат изградени и подземни гаражи.
Како второнаграден на конкурсот на кој беше избрано идејното решение, Чаушески, преку фирмата „Архитектоника“, доби 600.000 денари. Министерството за образование и наука сега го бара изведувачот кој ќе го добие тендерот за изведување на градежните работи. Фирмите имаат рок до 6-ти јули да ги достават понудите.