Граѓанското здружение „Континео 2020″ од Скопје во соработка со ЈЛДА (Young People for Local Development Association) од Торино, Италија ги објавија имињата на селектираните уметници од Првиот саем на современа уметност – „Паратисима Скопје”, кои по учеството на саемот од 13 до 15 јуни во Младинскиот културен центар, беа селектирани и наградени со учество на Паратисима Торино, Италија која ќе се одржи во ноември, 2014 година. Како што информираше организаторот на првото издание на Паратисима Скопје учествуваа околу деведесет уметници кои се претставија со различни видови дела од визуелната уметност, дизајн и накит, уметнички перформанси ,проекции, музички концерти, работилници, презентации, и други содржини.
На Паратисима Скопје се претставија автори од повеќе земји меѓу кои и Италија, Франција, Грција и Црна Гора.
Селектираните учесници за оваа година се: Ленче Андонова, Борче Богоевски, Ана Лазаревска, Ненад Тонкин, Творница, Калина Брајковска, Лудус и Џаст Бикоз (Just Because), Маја Кировска, Горан Менков, Бојан Ивановски. Вон селекцијата е уметницата Александра Илиќ којашто беше спомената како млад автор којшто се истакна со своето дело и настап.
Селекцијата ја изведоа уметничките директори на Паратисима Скопје – Елена Вељановска и Паратисима Торино – Алесандро Стило.
Паратисима Скопје се реализираше со финансиска поддршка од Стопанска комора Торино и во партнерство со Младинскиот културен центар.