Маж од Луизијана (САД) ја застрела и уби својата сопруга, го стави нејзиното тело на совозачкото седиште, а потоа возеше низ неколку сојузни држави сè додека полицијата не го запре при рутинска сообраќајна контрола.
Тајрон Бразил (50) е уапсен во четвртокот вечерта откако полицијата го запрел во центарот на Мемфис и ја пронајде неговата 50-годишна сопруга Ланеса Брадфорд мртва, со прострелна рана, на совозачкото седиште, пренесува WREG.
Двојката претходно престојуваше во паркот „Индепенденс комјунити“ во Батон Руж, на околу 130 километри северозападно од Њу Орлеанс, кога меѓу нив изби расправија.
Според истражителите од Батон Руж, Бразил тогаш наводно ја застрела и уби својата сопруга.
По пукањето, тој наводно побегна од местото на злосторството, но го зема телото на сопругата со себе.
Бразил потоа возеше повеќе од пет часа низ неколку сојузни држави со нејзиното тело на совозачкото седиште, пред полицијата во Мемфис да го запре и да дојде до ужасното откритие.
Долгогодишната пријателка на двојката, Шелика Декер, изјавила за WREG дека Бразил и Брадфорд беа во брак со години, но во последно време минуваа низ сериозна криза.
Според нејзините тврдења, Бразил има проблеми со менталното здравје, а Брадфорд минатиот месец ѝ кажа дека планира да го напушти.
– Таа собираше пари. Изработи план и имаше намера едноставно да исчезне. Тоа беше единствениот начин да побегне од него – изјави Декер.
Според неа, Брадфорд планираше да ги остави автомобилот и сите свои лични работи.