По големото разочарување и елиминацијата во групната фаза на Светското првенство, Фудбалскиот сојуз на Уругвај одлучи да сврти нов лист.
Марсело Биелса ја напушта селекторската позиција, а репрезентацијата привремено ќе ја преземе Диего Форлан, еден од најомилените играчи во историјата на уругвајскиот фудбал.
Мандатот на Марсело Биелса заврши со целосен колапс на односите во тимот. По освојувањето на третото место на Копа Америка, очекувањата беа високи, но Уругвај потфрли на Светското првенство. Пред одлучувачкиот натпревар против Шпанија, се појавија информации за сериозни несогласувања меѓу селекторот и играчите.
Дополнителни тензии предизвикаа неговите одлуки на последниот натпревар против Шпанија, кога го повлече голманот Фернандо Муслера уште на полувремето, а го замени Федерико Валверде кратко по почетокот на второто полувреме.
Уругвајскиот сојуз сега се свртува кон човекот кој ужива речиси митски статус во земјата.
Форлан го одбележа Светското првенство во 2010 година, каде што постигна пет гола и ја освои „Златната топка“ за најдобар играч на турнирот. Тој постигна 36 гола за репрезентацијата, а пред него се само Единсон Кавани и Луис Суарез.
Форлан треба да ја предводи репрезентацијата до март 2027 година, низ четири репрезентативни циклуси.
Покрај сениорскиот тим, тој ќе ја преземе и уругвајската репрезентација до 20 години, со која ќе настапи на Јужноамериканското првенство на почетокот на следната година.