Во време кога повеќето луѓе го започнуваат и завршуваат денот гледајќи во екранот на својот мобилен телефон, во Виена е отворено необично кафуле кое им нуди на гостите целосен одмор од дигиталниот свет.
Станува збор за поп-ап кафуле наречено „Офлајн Оида“, кое ги отвори своите врати на 25 април и ги пречекува гостите секој викенд кои бараат мир, разговор и дружење.
По пристигнувањето во барот, гостите се поканети да ги исклучат своите мобилни телефони, да ги стават во тивок режим или да ги остават во безбедни заклучени прегради. Целта е едноставна: да поминат неколку часа без скролање, пораки и постојана потреба да проверуваат нешто на екранот.
Наместо тоа, на посетителите им се нуди разговор, тишина, книги и друштвени игри.
Она што го прави овој концепт посебен е целосното отсуство на дигитална содржина. Во просторот нема екрани, нема интернет, ниту работна атмосфера карактеристична за модерните кафулиња каде што луѓето седат со лаптопи.
Наместо тоа, има едноставна понуда на кафе, чај и домашни колачи, катче за читање во соработка со градската библиотека и викенд дружење со аналогни друштвени игри.
Секој час се организира кратка заедничка пауза за дишење и релаксација.
Еден од иницијаторите на проектот, Кристоф Томан, изјави дека идејата се појавила како одговор на забрзаното темпо на животот.
„Офлајн е новиот луксуз. Сакавме да создадеме простор за вистински средби, ментално олеснување и чувство на заедница“, рече тој.
Кафулето е веќе познато по својата модерна интерпретација на австриската кујна и опуштената атмосфера, што го прави идеално место за концептот на дигитален одмор.