Голема порота во американската држава Ново Мексико го обвини американскиот актер Тимоти Басфилд по четири точки за криминален сексуален контакт со дете, соопшти обвинителството, објави NBC News.
„Како и во сите кривични постапки, Басфилд се смета за невин додека не се докаже неговата вина“, рече обвинителот Сем Брегман.
Тој додаде дека случајот ќе го води Одделот за жртви и се очекува судење.
Адвокатот на обвинетиот, Лари Штајн, рече дека обвинението „не е изненадување“ и дека Басфилд ќе ги оспори сите обвинувања на суд.
За време на сослушувањето, адвокатите рекоа дека ова е кампања за одмазда од страна на родителите, додека обвинителството тврдеше дека изјавите на децата биле детални и „не се претерани“.
Судијата нареди Басфилд да биде пуштен во очекување на судењето, утврдувајќи дека тој не претставува опасност за заедницата.
Басфилд, 68, беше уапсен пред помалку од еден месец под обвинение за злоставување и сексуален контакт со малолетници. Обвиненијата се однесуваат на две млади момчиња кои глумеа во ТВ серијата „Чистач“, во која Басфилд глумеше и режираше.