Американскиот државен секретар Марко Рубио изјави дека техничките разговори меѓу САД и Данска и Гренланд во врска со интересот на американскиот претседател Доналд Трамп за данската територија започнуваат денеска, наведувајќи дека е воспоставен „професионален процес“ што треба да доведе до „добар исход за сите“.
Тој изјави пред Комитетот за надворешни односи на американскиот Сенат дека, обраќајќи се пред сенаторите, состаноците на техничко ниво со партнерите од Гренланд и Данска се во тек или се во подготовка, оценувајќи дека процесот ќе биде редовен, професионален и ќе се спроведува без прекумерно медиумско внимание.
„Сакаме да го направиме ова без да го претвориме секој разговор во медиумски спектакл, бидејќи тоа остава повеќе простор за флексибилност и позитивен исход од двете страни“, рече Рубио, пренесува Си-Би-Ес Њуз.
Рубио го повтори своето верување дека разговорите ќе резултираат со позитивно решение и додаде дека очекува слични пораки од европските партнери во блиска иднина.
Рубио рече дека интересот на американскиот претседател за Гренланд е „јасен“ и дека тоа е прашање на национална безбедност, според Си-Би-Ес Њуз.
Пратениците од двете политички партии изразија загриженост за она што го нарекоа зголемена реторика на претседателот Трамп за преземање на Гренланд, вклучително и споменување на воена сила.
Сепак, Рубио нагласи дека Трамп „јасно ставил до знаење дека САД нема да употребат сила или воена сила на Гренланд“.
„Во моментов сме во добра позиција“, рече Рубио, додавајќи дека понатамошните разговори ќе започнат денеска.
За време на сослушувањето, Рубио призна дека Трамп погрешно го споменал Исланд наместо Гренланд неколку пати за време на говорот на Светскиот економски форум во Давос, наведувајќи дека тоа е лапсус.
„Мислеше на Гренланд. Сите знаеме дека претседателите понекогаш прават вербални грешки“, рече Рубио.