На Украина ѝ се потребни околу 800 милиони долари за да купи американско оружје до крајот на оваа година со помош на европските сојузници, изјави денес украинскиот претседател Володимир Зеленски.
Тој додаде дека следната година на Украина ќе ѝ бидат потребни околу 15 милијарди долари за програмата PURL, која вклучува купување американско оружје со европски пари.
По разговорите во Лондон со лидерите на Франција, Германија и Велика Британија, Зеленски изјави дека утре Украина ќе им претстави на САД ревидиран мировен план за завршување на војната.
Тој им изјави на новинарите дека ревидираниот план содржи 20 точки, но дека сè уште нема договор за откажување од териториите, на што инсистира Москва.
„САД, во принцип, се фокусирани на наоѓање компромис. Постојат сложени прашања поврзани со територијата, но сè уште не е пронајден компромис“, рече тој.
Тој го повтори својот често изјавуван став дека Украина не може да се откаже од ниту еден дел од својата земја.