„СДС не може глава да крене од скандали со дрога на нивни членови. Нов скандал на повидок од страна на член на СДС, кој пред 2 дена бил фатен со дрога“ рече денеска на прес-конференција пратеникот на ВМРО-ДПМНЕ, Бране Петрушевски.
„На 09.05.2025г, од информации добиени од свиркач, бил уапсен Слаѓан Марковски од Гостивар, активист на СДС, кој бил фатен со 12 пакувања кокаин и кеш. Ова е веќе сериозен проблем во редовите на СДС. По Јон Фрчковски, Андон Стојков, сега повторно член на СДС, Слаѓан Марковски, фатен со 12 пакувања дрога. Филипче нема каде да бега и да се скрие“ рече Петрушевски.
Тој јавно го праша Филипче „дали ќе се одрекне од Слаѓан Марковски, кој е активист на СДС? Дали ќе се одрекне и од Андон Стојков и Јон Фрчковски? Дали СДС со доаѓањето на Филипче, како чувар на местото на Заев, стана партија која секојдневно е поврзана со дрога и криминал?“.
„Македонската јавност има право да знае, а легитимно е да прашаме, дали Филипче има некаква поврзаност со членовите кои беа фаќани со дрога изминатиот период? Дали можеби и тој е влезен во некоја шема со дилање на дрога? Само пред да одговори, убаво да размисли. Да не испадне на крај како со златната виза за Дубаи“ рече Петрушевски.