Украинскиот 23-годишен фудбалер Михајло Мудрик е убеден дека ќе ја докаже својата невиност, откако за време на антидопинг контролата во примерокот од урината во неговото тело било откриено присуство на забранета супстанца.
„Ова целосно ме шокираше, бидејќи никогаш свесно не сум користел забранети супстанци или не сум прекршил правила и тесно соработувам со мојот тим за да истражам како тоа можело да се случи“, објави украинскиот репрезентативец на својот официјален профил на Инстаграм.
„Знам дека не направив ништо лошо и се надевам дека наскоро ќе се вратам на теренот. Сега не можам да кажам ништо повеќе поради доверливоста на процесот, но ќе направам штом можам”, додаде Мудрик.
Агенцијата PA има сознанија дека Украинецот е убеден дека позитивниот наод е резултат на контаминиран додаток на храна.
Според достапните информации, се чини дека примерокот Б се уште не е тестиран.
Тој беше тестиран на крајот на октомври и во тој примерок А беше пронајдена забранета супстанца. Ако примерокот Б покажува и присуство на забранета супстанција, Мудрик се соочува со суспензија до четири години.
Сепак, агенцијата PA има сознанија дека Мудрик бил на антидопинг контрола и во август, кога во неговиот примерок не била пронајдена забранета супстанција.
На украинскиот репрезентативец му се придружи и неговиот сегашен клуб Челзи.
„Фудбалскиот клуб Челзи може да потврди дека Фудбалската асоцијација неодамна го контактирала нашиот играч Михаил Мудрик во врска со позитивниот резултат од рутинскиот тест на урината“, соопштија од клубот.
Клубот објави дека „Михаило категорично потврдил дека никогаш свесно не користел забранети средства“.
Мудрик пристигна во Челзи во јануари 2023 година од Шахтјор и потпиша осум и пол годишен договор со лондонскиот клуб, за во април оваа година да го продолжи на уште една година. За Челзи имаше 53 настапи и постигна пет гола во сите натпреварувања.